САБАЛЕНКА

Сабаленка низ солзи за семејните трагедии: Се будам плачејќи

Белоруската тенисерка Арина Сабаленка во емотивно интервју за магазинот „Вог“ проговори за тешките животни трагедии што ги доживеала во последните години.Првата тенисерка во светот се потсети на смртта на нејзиниот поранешен партнер Константин Колцов, поранешен хокеар, кој во 2024 година падна од 23 кат од хотел во Мајами.Иако во тој период повеќе не биле во врска, Сабаленка признала дека трагедијата многу тешко ја поднела.„Се расправав со полицаецот, не можев да прифатам што ми зборува“, изјавила Сабаленка.Само неколку дена по трагичниот настан, таа одлучила да настапи на Мастерс турнирот.„Во такви ситуации нема точен или погрешен одговор. За мене, враќањето на теренот и работата беа единствената опција“, рекла белоруската тенисерка.Таа истакнала дека смртта на Колцов ја потсетила на загубата на нејзиниот татко Сергеј, кој починал во 2019 година од менингитис на 43-годишна возраст.„Итната помош во Минск дојде дури третиот ден. Тогаш веќе беше предоцна да го спасат. Велат дека времето помага, но мене сега на некој начин ми е уште потешко. Знам колку ќе беше среќен поради мојот успех“, изјавила Сабаленка.Таа открила и како се справува со болката и денес.„Се будам во солзи. Мојот сегашен партнер често ме затекнува како плачам во кревет затоа што на социјалните мрежи ќе видам некое видео за татковци или за старите добри времиња. Најмногу ме погодуваат снимките каде семејства ги слават успесите на своите деца во спортот. Замислувам како би реагирал мојот татко и плачам неконтролирано, како штотуку да сум го изгубила“, изјавила Арина Сабаленка.

Спорт | пред 22 часа

Сабаленка за војната и Украинците: „Толку многу омраза – како јас да фрлам бомби“

Најдобрата светска тенисерка Арина Сабаленка во опширно интервју за магазинот „Вог“ зборуваше за тешките емоции и тензиите што ги доживува на терените, особено во натпреварите против украинските тенисерки, кои често одбиваат да ѝ подадат рака по завршувањето на мечевите.Белоруската тенисерка се осврна и на обвинувањата дека го поддржува режимот на Александар Лукашенко, како и на критиките дека како прва тенисерка во светот не го осудува доволно јасно воениот конфликт.„Го почитувам нивниот став да не подаваат рака. Знам дека тоа не е лично, туку дека така испраќаат порака“, изјави Сабаленка.Сепак, призна дека ваквите ситуации тешко ги поднесува, како и атмосферата што се создала на ВТА турот.„Но тешко е да се издржи толкава количина омраза од некои луѓе на турот. Еден тренер полуде против мене и ми рече дека јас сум таа што фрла бомби“, откри тенисерката.И покрај сè, Сабаленка јасно го изнесе својот став за војната и улогата на спортот во актуелните случувања.„Очигледно е дека сакам мир за сите. Не ја сакам оваа војна. Треба да седнат на маса и да се договорат. Но исто така мислам дека спортот е платформа и место каде што сите треба да бидат заедно, а не да се борат едни против други. Бидете заедно, покажете мир“, порача светскиот рекет број еден.Говорејќи за односите меѓу народите, Сабаленка потсети на периодот кога Белорусите и Украинците имале многу поблиски врски.„Толку долго Украинците и Белорусите беа како браќа и сестри. Ние сме исти, долго време бевме заедно, а сега има голем ѕид меѓу нас. Не знам како сето ова ќе заврши“, изјави таа.На спортски план, Сабаленка и понатаму го држи првото место на ВТА-листата, каде што веќе подолг период е доминантна фигура во женскиот тенис.Сепак, сериозна конкуренција ѝ претставува Елена Рибакина.По поразот во финалето на Австралија опен токму од Казахстанката, предноста на Сабаленка на врвот значително се намали и сега изнесува 1.255 поени.Бидејќи во продолжението од сезоната брани голем број бодови, белоруската тенисерка ќе има сериозен предизвик да ја задржи лидерската позиција на ВТА-листата.

Спорт | пред 1 ден

(Видео) Сабаленка ја прекина победничката беседа во Мајами: „Тоа не смее да се прави“

Белоруската тенисерка Арина Сабаленка ја заокружи големата вечер во Мајами со нов трофеј, но вниманието по финалето го украде еден неочекуван момент – директното обраќање до навивачка која, според неа, ја преминала границата на спортското однесување.Сабаленка во финалето ја совлада Американката Коко Гоф со 6:2, 4:6, 6:3, одбрани титула и го комплетираше таканаречениот „Sunshine Double“. Сепак, во третиот сет се случи ситуација што ја исфрли од такт: при резултат 3:2, додека траеше размена, една гледачка извикала „аут“, што предизвикало реакција и на судијата, а Сабаленка реагирала бурно – по што добила опомена.Наместо инцидентот да остане зад неа, Сабаленка го спомена веднаш по мечот, среде победничкиот говор. Таа најпрво се обиде да ја најде навивачката во публиката, а потоа порача дека такво мешање во играта не е прифатливо, притоа признавајќи дека и самата не требало да реагира на начинот на кој реагирала.„Не знам каде сте... таа госпоѓа што викаше, што ‘навијаше’ топката да биде аут. Не требаше така да реагирам, ама... тоа не можете да го правите, знаете? Ајде да се согласиме дека и двете згрешивме, се извинувам“, рече Сабаленка.Подоцна, во разговор по финалето, таа повторно се осврна на нервозата што ја почувствувала во тој дел од мечот и нагласи дека не е горда на изговореното во жарот на моментот, но и дека ваквите довикувања од трибините не смее да станат „нормална“ појава.Сцената во Мајами е уште еден потсетник колку тенка може да биде линијата меѓу навивање и влијание врз натпреварот – особено во моменти кога мечот влегува во најкритичната фаза.

Свет | пред 1 месец