САД депортирале рекордни 483.200 лица во една година

Американската Служба за имиграција и царина (ICE) депортирала 483.200 лица во последната фискална година, што е највисока бројка во 23-годишната историја на агенцијата, соопшти Министерството за внатрешна безбедност на САД.

Бројот на депортации во фискалната година што завршила на 30 септември е за девет отсто поголем од претходниот рекорд од 442.640 лица, забележан една година претходно, и за 78 отсто повисок во споредба со 2024 година, последната година од претседателскиот мандат на Џо Бајден.

— реклама —

Администрацијата на Доналд Трамп обезбедила дополнителни средства за службениците, притворските центри и летовите за депортација. Сепак, не објавила колку од депортираните имале криминално досие ниту детална статистичка анализа. Редовното објавување податоци за апсењата и депортациите било прекинато на почетокот на вториот мандат на Трамп.

— реклама —

Марк Розенблум, соработник на Институтот за миграциска политика и поранешен функционер во Министерството за внатрешна безбедност, потврдил дека ICE бележи рекорден број апсења, но оценил дека недостигот од детални податоци ја отежнува целосната процена на работата на агенцијата.

Според податоците на Проектот за депортации, само околу една четвртина од лицата депортирани во јули имале правосилни кривични пресуди, додека повеќе од половината воопшто не се соочувале со обвиненија. Овие податоци се разликуваат од најавите на Трамп дека неговата имиграциска политика ќе биде насочена кон мигранти кои извршиле кривични дела.

— реклама —

Политиката на американската администрација предизвика протести, особено по распоредувањето на повеќе од 2.000 федерални службеници во Минеаполис претходно годинава. За време на судирите со агентите загинале двајца американски државјани, 37-годишните Рене Гуд и Алекс Прети, по што администрацијата се откажала од дел од видливите операции.

— реклама —

И покрај рекордниот број депортации, резултатот сè уште е под целта на Белата куќа од еден милион депортации годишно.

Најголемиот број депортации во американската историја бил забележан во 1954 година, за време на кампањата на претседателот Двајт Ајзенхауер против нелегалните мигранти од Мексико, кога од земјата биле отстранети 1,1 милион лица.