Администрацијата на американскиот претседател Доналд Трамп започна глобално партнерство со повеќе од 20 сојузнички држави со цел да го забрза развојот на безбедни 6Г безжични мрежи и да го ограничи влијанието на Кина врз следната генерација телекомуникациски технологии.
Во иницијативата учествуваат земји како Велика Британија, Германија, Јапонија, Франција, Италија, Австралија, Канада, Финска, Шведска, Норвешка, Република Кореја и други сојузници, кои ќе ги координираат своите стратегии за развој на 6Г технологијата, која се очекува да почне постепено да ги заменува 5Г мрежите во текот на 2030-тите години.
Партнерството предвидува воспоставување контакт-точки во владите на земјите учеснички, размена на технички ресурси и подготовка за идната комерцијална примена на новата генерација безжични комуникации.
Според американските власти, иницијативата е одговор на растечките амбиции на Кина во телекомуникацискиот сектор и на глобалното влијание на кинеските компании „Хуавеи“ и „ЗТЕ“. Вашингтон смета дека тесната координација со сојузниците е клучна за поставување на идните меѓународни технички стандарди.
Директорката на Националната управа за телекомуникации и информации (NTIA), Ариел Рот, изјави дека 6Г ќе се разликува значително од 5Г и дека лидерството на САД и нивните партнери бара нов пристап.
„Со соработка со доверливи партнери ќе обезбедиме мрежите од следната генерација да ги одразуваат нашите заеднички безбедносни интереси, да ја зајакнат конкурентноста и да поттикнат иновации“, порача Рот.
Американските власти најавуваат дека во следните месеци ќе бидат преземени конкретни чекори за зајакнување на синџирите на снабдување, забрзување на развојот на 6Г технологијата и изградба на отворени, безбедни и отпорни комуникациски системи. Следната година е планирана и прва заедничка средба на земјите учеснички, на која ќе се утврдат приоритетите за понатамошниот развој на технологијата.
