Американската администрација одлучи да го ограничи времетраењето на престојот на странските студенти и новинари во САД, во рамките на новите мерки за заострување на имиграциската политика.
Според предлогот, кој треба да стапи во сила за околу два месеци доколку биде одобрен во Конгресот, носителите на студентски визи ќе можат да престојуваат во САД најмногу четири години.
За странските новинари максималниот престој ќе биде ограничен на 240 дена, односно околу осум месеци, со можност за продолжување на визата за уште еден ист таков период.
За кинеските новинари ќе важат уште построги правила, при што нивните визи ќе бидат ограничени на само 90 дена.
Досега, студентските визи во САД се издаваа за времетраењето на студиите, а новинарските визи можеа да важат и до пет години.
Предлогот предизвика реакции кај меѓународните медиуми. Во заедничко отворено писмо, повеќе странски медиумски организации предупредија дека новите ограничувања би можеле да го намалат обемот и квалитетот на известувањето за настаните во САД.
