САД испраќаат 600 војници во Латинска Америка, се подготвуваат операции против наркокартелите

САД испраќаат стотици војници во Латинска Америка за обука на локалните безбедносни сили и заеднички воени вежби, додека Пентагон ја проширува кампањата против наркокартелите во регионот. Според информации на „Њујорк тајмс“, првите припадници на американската војска веќе се упатиле кон нов центар за обука во панамската џунгла.

Станува збор за делови од баталјон со 600 војници од елитната 10-та планинска дивизија, стационирана во Форт Драм, во сојузната држава Њујорк. По обуката во Панама, војниците треба да учествуваат во вежби со локалните сили во Колумбија и Хондурас. Можно е да обезбедуваат и поддршка за американските специјални сили што ги советуваат локалните армии во операции против осомничени наркобосови.

Дел од припадниците на дивизијата ќе помогнат и во пополнувањето на новата команда за операции на западната полутопка, со седиште во Мајами.

Овие распоредувања, за кои досега не било јавно известувано, се дел од поширокото засилување на американските воени активности против шверцот на дрога. Министерот за одбрана Пит Хегсет неодамна во Пентагон основал посебна канцеларија за надзор на воените активности против картелите. Во меѓувреме, неколку беспилотни летала MQ-9 Reaper биле префрлени од Африка во Колумбија и Еквадор.

Адам Исаксон, директор за надзор на одбраната во Вашингтонската канцеларија за Латинска Америка, оценува дека распоредувањето 600 американски војници во регионот е невообичаено голем чекор.

— реклама —

Тој изјавил дека не се сеќава на испраќање американски сили во Латинска Америка во таков број, освен во вонредни околности, како што се воени инвазии или природни катастрофи.

Засилените активности доаѓаат во време кога администрацијата на Доналд Трамп врши притисок врз регионалните лидери да ги интензивираат воените операции против групите што се занимаваат со шверц на дрога и да дозволат заеднички акции со американските сили. Главниот американски воен командант за Латинска Америка, генералот Френсис Л. Донован, веќе најавил планови за проширување на нападите од морето кон копното.

Иако повеќе земји од Латинска Америка се приклучиле на новиот политички и воен сојуз предводен од САД за борба против криминалните групи, само неколку, меѓу кои Колумбија и Хондурас, официјално се согласиле на заеднички операции на своја територија.

Двете земји ги предводат новоизбрани претседатели кои ја имаат поддршката на Трамп. Сепак, најавите за американски воени операции на латиноамериканска територија предизвикаа загриженост за почитувањето на државниот суверенитет и ги оживеаја сеќавањата на долгата и крвава историја на американските интервенции во регионот.

— реклама —

Организациите за човекови права стравуваат дека проширувањето на воената кампања би можело да доведе до цивилни жртви. Експертите, пак, предупредуваат дека убивањето припадници на картелите, вклучително и нивните водачи, не мора да го запре шверцот на дрога, бидејќи на нивно место доаѓаат нови луѓе.

Дополнителен предизвик за Вашингтон е војната против Иран, која веќе ги оптоварува американските вооружени сили. Ангажирани се борбени авиони, носачи на авиони, извидувачки беспилотни летала и летала за полнење гориво во воздух, а воените активности ги намалиле и глобалните резерви на одредени видови клучна муниција.

Американската Јужна команда одбила да ги коментира конкретните воени потези за „Њујорк тајмс“, но во соопштение навела дека Пентагон е посветен на соработката со способните сојузници и партнери, со цел продлабочување на заедничките активности и одржување постојан притисок врз заканувачките мрежи во регионот.

Администрацијата на Трамп го поставила зајакнувањето на американското влијание во Латинска Америка како еден од своите приоритети. Во таа насока е формиран воен сојуз со 19 регионални партнери кои се обврзале да помогнат во разбивањето на наркокартелите. Официјалното мото на коалицијата гласи: „Им правиме лоши работи на лошите луѓе“.

Генералот Џозеф А. Рајан, командант на американските копнени сили за западната полутопка, неодамна зборувал за предизвиците со кои се соочува американската војска при враќањето во регион што со децении не бил во средиштето на нејзините активности.

— реклама —

„Му ја препуштивме економската доминација во регионот на нашиот противник, Кина, и тоа е факт. Сега се бориме да го вратиме просторот – на море и на копно, физички и во сферата на влијанието врз размислувањето – од кој во многу случаи претходно се повлековме“, изјавил Рајан.

Американските војници од 10-та планинска дивизија прво ќе поминат обука за дејствување во џунгла во Панама. Потоа ќе заминат во Колумбија, каде што кон крајот на месецот треба да учествуваат во воената вежба „Јужна претходница“. Други ротации ќе бидат упатени на обука во Хондурас.

Дел од војниците ќе обезбедуваат дополнителна заштита за американските хеликоптери што ги поддржуваат специјалните сили на теренот. Тие би можеле да интервенираат и доколку американските специјалци, кои им помагаат на локалните армии, се најдат во опасност.

Иако засега станува збор за привремени распоредувања, американски претставници признаваат дека тие би можеле да прераснат во трајно обележје на военото присуство на САД во регионот.

Во исто време, во американските политички и воени кругови постои загриженост дека администрацијата на Трамп не ги дефинирала јасно крајните цели на операцијата, ниту начинот на кој таа би завршила. Дел од високите функционери стравуваат дека евентуални напади врз американски војници би можеле да ги вовлечат веќе оптоварените американски сили во нова воена криза.

Новата Заедничка оперативна група за западната полутопка, под команда на генерал-мајорот Кевин Џ. Џерард, ги продолжува активностите на Пентагон во Карипското Море и источниот Пацифик. Во рамките на досегашната кампања биле извршени 71 напад врз пловни објекти, при што загинале најмалку 239 лица осомничени за шверц на дрога.

Правни експерти предупредуваат дека овие напади се незаконски, бидејќи шверцерите на дрога не претставуваат легитимни воени цели. Според нив, префрлањето на нападите на копно дополнително го зголемува ризикот од цивилни жртви и уништување инфраструктура, вклучително и училишта.

И покрај критиките, Хегсет минатиот месец со внатрешен допис одобрил 20 милиони долари за новата канцеларија за борба против картелите. Нејзиното раководење треба да му биде доверено на пензионираниот генерал Едвард М. Ридер Џуниор.

Хегсет порачал дека коалицијата ќе дејствува со „немилосрдна ефикасност и брзина“ за да ги уништи, како што ги нарекува, наркотерористите. Сепак, проширувањето на воените активности отвора сериозни прашања за нивната законитост, можните цивилни жртви и ризикот од нова ескалација во регион во кој американското воено присуство повторно се засилува.