Полска и САД водат разговори за проширување на американското воено присуство, вклучително и за можноста за воспоставување постојана американска воена база во земјата, објави полскиот весник „Дзеник газета правна“, повикувајќи се на извори запознаени со преговорите.
Според информациите, во наредните три месеци во Полска би требало да пристигнат дополнителни американски војници, додека конечната одлука за евентуална постојана база се очекува во рок од шест до дванаесет месеци.
Полските власти разговараат со американската администрација за две прашања – зајакнување на ротациското распоредување на американските сили и отворање постојана воена база.
По посетата на Пентагон, директорот на полското Биро за национална безбедност, Бартош Гродецки, изјави дека американските претставници повеќепати ја оцениле Полска како „примерен сојузник“.
Во моментов во Полска се стационирани околу 10.000 американски војници, што ја прави земјата едно од најважните американски воени упоришта на источното крило на НАТО.
Варшава веќе неколку години бара поголемо и трајно американско воено присуство, оценувајќи дека тоа ќе ја зајакне безбедноста и одвраќањето од Русија, особено во услови на продолжување на војната во Украина.
Прашањето се очекува да биде една од темите и на претстојниот самит на НАТО, каде што фокусот ќе биде ставен на зајакнување на одбраната на Алијансата, зголемување на воените трошоци и поддршката за Украина.
