САД ја преиспитуваат воената присутност во Европа: Трамп бара Европа сама да се грижи за својата одбрана

Соединетите Американски Држави започнаа ревизија на своето воено присуство во Европа, потег што следува по повеќекратните критики на американскиот претседател Доналд Трамп кон европските сојузници во НАТО.

Одлуката беше објавена еден месец откако американскиот министер за одбрана Пит Хегсет најави ваков чекор, оценувајќи дека европските партнери не презеле доволно одговорност, особено во контекст на воените случувања поврзани со Иран.

— реклама —

Заменик-министерот за одбрана Елбриџ Колби соопшти дека целта на ревизијата е европските членки на НАТО што побрзо и трајно да ја преземат главната одговорност за сопствената конвенционална одбрана.

— реклама —

„Оваа ревизија ќе придонесе НАТО да стане посилен, поправеден и поодржлив сојуз“, порача Колби.

Хегсет претходно им порача на сојузниците дека Европа мора да преземе водечка улога во сопствената безбедност, додавајќи дека не сите земји ќе ги исполнат очекувањата на Вашингтон.

— реклама —

Американската администрација е незадоволна и од реакцијата на дел од европските држави за време на конфликтот со Иран, како и од фактот што некои од нив не дозволиле користење на американски бази за воени операции. Вашингтон повторно предупреди дека би можел да го намали својот финансиски придонес во НАТО доколку сојузниците не ги исполнат обврските за издвојувања за одбраната.

— реклама —

Од европска страна, германскиот канцелар Фридрих Мерц изјави дека европските сојузници се свесни оти САД во иднина би можеле да го намалат своето воено присуство на континентот, поради што Европа мора да биде подготвена самостојно да се грижи за сопствената безбедност.

Во меѓувреме, претседателката на Европската комисија Урсула фон дер Лајен и генералниот секретар на НАТО, Марк Руте, порачаа дека Алијансата треба да стане „поевропска“, со посилна улога на европските членки и помала зависност од американската воена заштита.