Американскиот претседател Доналд Трамп нареди забрзување на развојот на квантен компјутер за научни истражувања и заштита на владините системи од сајбер-закани, со што дополнително се интензивира технолошката трка меѓу САД и Кина.
Според директорот на Канцеларијата за научна и технолошка политика на Белата куќа, Мајкл Крациос, администрацијата верува дека функционален квантен компјутер би можел да биде развиен до 2028 година.
Трамп потпиша два извршни указа, од кои едниот предвидува заштита на владините компјутерски системи од потенцијални сајбер-напади овозможени од квантната технологија. Планот предвидува клучните државни системи да преминат на таканаречена постквантна криптографија најдоцна до 2030 или 2031 година.
Квантните компјутери користат принципи на квантната физика и имаат потенцијал да решаваат исклучително сложени задачи многу побрзо од денешните суперкомпјутери. Експертите предупредуваат дека ваквата технологија во иднина би можела да ја пробие постојната енкрипција што ги штити компјутерските системи, што отвора сериозни безбедносни предизвици.
Наредбите на Трамп ја нагласуваат намерата на Вашингтон да го задржи водството во развојот на квантните технологии, кои би можеле значително да придонесат за напредокот во вештачката интелигенција, хемијата, науката за материјали и други области.
Дополнително, Пентагон доби задача до 2028 година да распореди квантни сензори кои би можеле да се користат за навигација во услови кога GPS-системите се попречени, како и за откривање подземни активности, вклучително и изградба на тунели и ракетни силоси.
Еден од указите предвидува и зајакнување на меѓународната соработка за заштита на интелектуалната сопственост и безбедноста на синџирите на снабдување, во услови на зголемена геополитичка конкуренција.
