Соединетите Американски Држави најавија почеток на широка кампања против Меѓународниот кривичен суд (МКС), обвинувајќи го дека „води војна“ против Вашингтон и им се заканува на американските граѓани, при што најавија и нови санкции.
Американскиот државен секретар Марко Рубио изјави дека МКС и неговите сојузници не водат војна со оружје, туку преку меѓународното право.
„Додека разговараме, Меѓународниот кривичен суд и неговите сојузници водат војна против нашата земја, не со куршуми или ракети, туку со статути, договори и силата на она што го нарекуваат меѓународно право“, изјави Рубио.
Тој оцени дека опасноста од Судот постојано расте и предупреди дека, доколку САД не реагираат, американските граѓани би можеле да бидат изложени на кривично гонење од странски судии.
Односите меѓу администрацијата на претседателот Доналд Трамп и Меѓународниот кривичен суд, со седиште во Хаг, веќе подолго време се затегнати. Неколку судии, како и главниот обвинител на Судот, веќе се под американски санкции.
Овие мерки вклучуваат забрана за влез во САД, како и блокирање на финансиски и имотни трансакции на територијата на земјата.
Американските санкции главно се одговор на истрагите што МКС ги водеше против Израел. Судот во 2024 година издаде налог за апсење на израелскиот премиер Бенјамин Нетанјаху.
Меѓународниот кривичен суд е основан во 2002 година и е надлежен за гонење лица обвинети за најтешки кривични дела, како што се воени злосторства, злосторства против човештвото и геноцид.
Соединетите Американски Држави, Израел и Русија не се потписнички на Римскиот статут, меѓународниот договор со кој е основан Судот. Рускиот претседател Владимир Путин, пак, од март 2023 година е предмет на налог за апсење издаден од МКС.
