Белата куќа ја обвини кинеската компанија Moonshot AI дека наводно ја искористила технологијата на американската компанија Anthropic за развој на својот модел за вештачка интелигенција K3, како и дека набавила напредни AI-чипови на „Енвидија“, пренесува „Ројтерс“.
Високиот претставник на Белата куќа за технологија, Мајкл Крациос, на социјалната мрежа „Икс“ објави дека американските власти располагаат со информации оти Moonshot AI ја применила методата на дестилација врз јазичниот модел Fable на Anthropic за да го развие својот модел K3.
„Масовната и прикриена индустриска дестилација со цел кражба на заштитена американска технологија и поткопување на американските истражувања е целосно неприфатлива“, порача Крациос.
Тој исто така наведе дека Moonshot AI набавила сервери опремени со моќните AI-чипови GB300 на „Енвидија“ и ги користела во Тајланд, најверојатно за обука на своите модели за вештачка интелигенција.
Според дипломатска депеша во која имал увид „Ројтерс“, американскиот Стејт департмент уште во април започнал глобална иницијатива за предупредување на наводните обиди на кинески компании, меѓу кои се споменува и Moonshot AI, да присвојуваат интелектуална сопственост од американски лаборатории за вештачка интелигенција.
Дестилацијата е процес во кој помали модели за вештачка интелигенција се обучуваат со користење на резултатите од поголеми и помоќни модели, со цел да се намалат трошоците за развој. Американските компании претходно предупредија дека оваа техника може да се злоупотреби за неовластено копирање на напредни AI-системи.
Кинеската компанија минатата недела го претстави моделот Kimi K3 со 2,8 трилиони параметри, за кој тврди дека е најголемиот модел со отворени тежини во светот и дека неговите перформанси се приближуваат до оние на моделот Fable на Anthropic.
Moonshot AI досега јавно не ги коментираше обвинувањата на американските власти.
