Соединетите Американски Држави денеска воведоа нови царини за увоз од 60 свои трговски партнери, образложувајќи дека тие земји не преземаат доволно мерки за спречување на принудната работа. Новите давачки се движат од 10 до 12,5 проценти и ги опфаќаат клучните економски партнери на Вашингтон, меѓу кои се Велика Британија, Кина, Европската Унија, Канада, Бразил, Јапонија, Индија, Русија и Турција.
Мерките стапија во сила веднаш по истекот на привремената царина од 10 проценти за странска стока. Претходно оваа година, Врховниот суд на САД оцени дека голем дел од глобалните царини воведени врз основа на вонредни овластувања биле незаконски, по што администрацијата на претседателот Доналд Трамп започна да бара нова правна основа за спроведување на својата трговска политика.
Белата куќа минатиот месец предложи нови царини за увоз од десетици земји, наведувајќи дека тие не прават доволно за сузбивање на принудната работа.
„Новата мерка ќе помогне да се исправи практика која претставува и злоупотреба на човековите права и нарушување на фер трговијата, со цел подобрување на благосостојбата на работниците ширум светот“, изјави американскиот трговски претставник Џејмисон Грир, повикувајќи се на член 301 од Законот за трговија од 1974 година.
Новите царини се однесуваат на 99,4 проценти од увозот од 60-те најголеми трговски партнери на САД.
Бразил, Јапонија и Австралија ги оценија мерките како неоправдани, додека Кина ги отфрли американските обвинувања, тврдејќи дека во земјата не постои принудна работа.
Шефицата на дипломатијата на Европската Унија, Каја Калас, исто така го оспори образложението на Вашингтон, оценувајќи дека тврдењата за недоволна контрола врз принудната работа во земјите членки на ЕУ се неосновани.
