Соединетите Американски Држави воведоа санкции против мрежата „Шипоил“ (Shipoil), грчка групација од бродскиот сектор, за која американските власти тврдат дека одржувала врски со Иранската револуционерна гарда и со руската „сенчеста флота“.
Американското Министерство за финансии соопшти дека мрежата ги опфаќа компанијата Shipoil Limited со седиште во Хонгконг, како и филијалите Shipoil FZCO и Ship Fuels and Trade DMCC од Дубаи. Компаниите, според американските власти, се контролирани од Алберто и Џорџ Цорис.
Според соопштенијата на Министерството за финансии и доверливи поморски извештаи до кои дошол грчкиот весник „Катимерини“, мрежата обезбедува услуги за снабдување со гориво на бродови и е присутна во Пиреја.
Американските власти тврдат дека компаниите на „Шипоил“ соработувале со ирански нафтени компании, субјекти поврзани со државната иранска бродска компанија IRISL, како и со бродска мрежа поврзана со иранскиот бизнисмен Хосеин Шамхани.
Според податоците на американското Министерство за финансии, филијали на „Шипоил“ во 2026 година снабдувале со гориво танкери за кои американските власти тврдат дека превезувале товар за иранските вооружени сили, како и пловила контролирани од државната иранска бродска компанија.
Грчките власти соопштија дека санкциите се воведени еднострано од Вашингтон, а не од Европската унија, поради што, според нив, во моментов нема правна основа за преземање домашни мерки против компаниите.
Санкциите претставуваат уште еден чекор на САД во насока на ограничување на мрежите за кои Вашингтон смета дека им помагаат на Иран и Русија да го заобиколат меѓународниот санкциски режим.
