И покрај четиригодишната војна во Украина и серијата западни санкции, руската економија продолжува да покажува поголема отпорност отколку што предвидуваа многу аналитичари.
Според најновите анализи на повеќе меѓународни истражувачки центри, економската состојба во Русија е далеку посложена од претходните прогнози за брз економски колапс. Иако извештајот на Килскиот институт за светска економија предупредува на „структурна исцрпеност“, економските показатели сè уште не укажуваат на драматичен пад.
Дел од експертите, меѓу кои и Чарлс Хекер од Кралскиот институт за обединети служби, сметаат дека Русија веќе се движи кон рецесија, додека други предупредуваат на можна криза во руската политичка економија. Сепак, официјалните податоци покажуваат пад на бруто-домашниот производ од само 0,2 проценти во првиот квартал од 2026 година.
Од почетокот на конфликтот во 2022 година, Москва успеа делумно да ги ублажи ефектите од санкциите преку пренасочување на трговијата кон Кина, Индија и други земји, како и преку значителни вложувања во воената индустрија, инфраструктурата и социјалните програми.
Во периодот од 2022 до 2025 година, БДП по глава на жител во Русија пораснал за 12 проценти. Дополнително, невработеноста останува на ниско ниво од околу два проценти, додека реалните плати се за околу 25 проценти повисоки во споредба со 2019 година.
Аналитичарите наведуваат дека главен двигател на економскиот раст и натаму се високите воени трошоци, кои достигнуваат меѓу седум и осум проценти од БДП. И покрај тоа што ваквата политика создава дополнителен притисок врз буџетот и пазарот на труд, засега таа овозможува одржување на економската активност.
Според проценките, руската економија годинава би можела да оствари раст од околу еден процент, што е споредливо со економскиот раст на некои западни земји. Експертите оценуваат дека за посериозно нарушување на руската економија би биле потребни значително построги санкции и подолготраен пад на цените на нафтата.
