Потпишувањето на нуклеарниот договор со Соединетите Американски Држави претставува значаен дипломатски и стратешки успех за Саудиска Арабија, која со години настојуваше да обезбеди американска поддршка за развојот на својата цивилна нуклеарна програма.
Иако посетата на американскиот претседател Доналд Трамп на Ријад минатата година беше оценета како успешна поради најавените милијардни инвестиции и продлабочувањето на економската соработка, тогаш не беа исполнети две клучни барања на Саудиска Арабија – безбедносни гаранции од Вашингтон и поддршка за нуклеарната програма.
Развојот на нуклеарната енергија е важен дел од реформската програма „Визија 2030“, со која престолонаследникот Мохамед бин Салман има цел да ја диверзифицира економијата и да обезбеди доволно енергија за новите индустрии, меѓу кои и големите центри за податоци и развојот на вештачката интелигенција.
Според нуклеарниот експерт Нур Еид, Саудиска Арабија не сака да се откаже од правото на збогатување ураниум, кое е дозволено според Договорот за неширење на нуклеарното оружје. Тој оценува дека можноста да го задржи тоа право во договорот со САД е причина за задоволство во Ријад.
Нуклеарните амбиции на Саудиска Арабија се поврзани и со безбедносната состојба во регионот. Израел поседува нуклеарен арсенал, иако официјално не го признава, додека Иран тврди дека неговата нуклеарна програма е исклучиво за мирољубиви цели. Сепак, Израел и западните земји сметаат дека Техеран се стреми кон производство на нуклеарно оружје.
Токму можноста Иран да развие атомска бомба со години е една од најголемите грижи на саудиското раководство. Престолонаследникот Мохамед бин Салман уште пред неколку години предупреди дека доколку Иран дојде до нуклеарно оружје, Саудиска Арабија ќе биде принудена да одговори со сопствени нуклеарни капацитети.
Со договорот меѓу Вашингтон и Ријад, Саудиска Арабија направи значаен чекор кон остварување на своите долгорочни енергетски и геополитички цели, иако разликите меѓу двете земји, особено околу односите со Израел, и понатаму остануваат.
