Саудиска Арабија, Турција и Пакистан денес ќе потпишат договор за одбранбена соработка

Саудиска Арабија, Турција и Пакистан денес во Џеда ќе потпишат заеднички договор за одбранбена соработка, јавува Ројтерс, повикувајќи се на регионални извори запознаени со преговорите.

— реклама —

На церемонијата на потпишување ќе присуствуваат турскиот претседател Реџеп Таип Ердоган, пакистанскиот премиер Шехбаз Шариф и командантот на пакистанската армија Асим Мунир, кои ќе се сретнат со саудискиот престолонаследник Мохамед бин Салман.

— реклама —

Турски претставник потврди дека договорот ќе биде потпишан, но засега не се објавени детали за конкретните обврски што ќе ги преземат трите држави.

Според информациите, договорот е резултат на речиси едногодишни преговори. Турција е членка на НАТО, Саудиска Арабија е најголемата економија во Персискиот Залив и еден од водечките светски извозници на нафта, додека Пакистан е единствената муслиманска држава што поседува нуклеарно оружје.

— реклама —

Турскиот министер за надворешни работи Хакан Фидан претходно изјави дека Анкара се залага за поширока регионална безбедносна платформа која ќе ја зајакне соработката и стабилноста во регионот.

— реклама —

Пакистанската армија и властите во Саудиска Арабија засега не ги коментираа информациите за договорот.