Портпаролката на Владата Марија Митева остро реагираше на прес-конференцијата на СДСМ и настапот на Богданка Кузеска, оценувајќи дека станува збор за обид за одбрана на старите практики во правосудниот систем.
Според Митева, изјавите на СДСМ претставуваат „директна демонстрација“ на нивниот пристап кон обвинителството и институциите.
„Денешната прес-конференција на СДС и настапот на Богданка Кузеска се најдиректна демонстрација на исправноста на нашите позиции. Уште еднаш ја направија јасна суштината на нивното дејствување во правосудниот систем“, изјави Митева.
Таа посочи дека СДСМ повторно се обидува да ја наметне, како што рече, „старата матрица“, каде институционалните одлуки се толкуваат како притисок, а реформите како елиминација.
„Тоа не е ништо друго освен обид да се задржи влијанието врз обвинителството преку наративи кои одамна се прочитани“, рече таа.
Митева нагласи дека реформите во правосудството се неопходни и дека системот мора да се ослободи од, како што наведе, долгогодишни слабости.
„Ако сакаме здраво и кредибилно обвинителство, мора да се расчисти со сè што со години ја поткопуваше неговата улога – од селективност, влијанија, неформални центри на моќ до затворени кругови кои одлучуваа наместо законите“, истакна портпаролката.
Таа додаде дека, наместо поддршка за реформи, СДСМ се обидува да релативизира и да брани состојби кои, според неа, овозможувале заштита на криминалот.
„Вистинската реформа значи одговорност за секого без исклучок. Значи систем во кој нема недопирливи и нема простор за толкување на правдата според потребите на поединци или групи“, рече Митева.
На крајот, таа порача дека времето кога обвинителството било под политичко влијание мора да заврши.
„Времето кога обвинителството им служеше како продолжена рака – мора да заврши“, изјави Митева.
