Социјалдемократскиот сојуз на Македонија преку соопштение обвини дека Владата, предводена од Христијан Мицкоски, нема да ја исполни Реформската агенда во рокот што самата го постави, оценувајќи дека станува збор за уште едно неисполнето ветување кон граѓаните.
Од СДСМ посочуваат дека остануваат уште три дена до 1 јуни, датум до кој, според нив, премиерот ветил целосно исполнување на обврските поврзани со продолжување на европскиот пат на државата.
„Три дена до уште едно неисполнето ветување и уште една голема лага на Мицкоски“, наведуваат од партијата.
Во соопштението се додава дека Владата за две години реализирала само дел од предвидените точки, а како клучен проблем ги посочуваат уставните измени и внесувањето на малцинствата во Уставот.
Од СДСМ тврдат дека без исполнување на тие обврски нема да има напредок во преговорите со Европската Унија, отворање нови поглавја и пристап до европски фондови.
„Нека ги внесе малцинствата во Уставот или нека излезе пред граѓаните и признае дека не сака членство во ЕУ“, порачуваат од партијата.
Во соопштението се наведува и дека ВМРО-ДПМНЕ, како што велат, избегнува европски правила и механизми за одговорност поради страв од борбата против криминалот и корупцијата.
