СДСМ побара премиерот Христијан Мицкоски јавно да им се извини на граѓаните, обвинувајќи го дека со месеци користел навредливи квалификации кон оние кои не се согласуваат со неговите политики.
„Христијан Мицкоски им должи јавно извинување на граѓаните на Македонија. Не на пратениците во празна сала, туку на граѓаните кои ги навредуваше со месеци“, соопшти партијата.
Од СДСМ наведуваат дека Мицкоски ги нарекувал граѓаните „талог на општеството“, „глодари“, „медиокритети“ и „мекотели“, оценувајќи дека таквиот речник не е достоинствен за премиер.
„Ги омаловажуваше сите кои не се согласуваат со него, кои ја критикуваат неговата политика или кои едноставно бараат подобар живот. Таквото однесување не е достојно за премиер на држава. Уште помалку е достојно за човек кој се претставува како универзитетски професор“, наведува СДСМ.
Во партиското соопштение се споменува и министерот Иван Стоилковиќ, за кого тврдат дека во Собранието „отворено пцуел пратеници“ и дека се обидел физички да се пресмета со пратеникот Митко Трајчулески.
Според СДСМ, едно „извинете“ изговорено во Собранието не е доволно за да се избришат, како што велат, сите претходни навреди кон граѓаните.
„Христијан Мицкоски должи јавно и искрено извинување на граѓаните на Македонија. Сè додека тоа не го направи, ќе остане запаметен како премиер кој наместо да ги обединува граѓаните, ги навредува и ги понижува“, се наведува во соопштението.
