СДСМ преку соопштение соопшти дека преку своите советници побарале спроведување вонредни анализи на водата за пиење во Велес и околните населени места, како и проверка на квалитетот на водата во сите општини во државата.
Од партијата наведуваат дека во Велес побарале да се испитаат сите селски водоводи, повикувајќи се на, како што велат, јавно објавени наоди и стручни мислења според кои во повеќе водоводи било утврдено присуство на бактеријата Escherichia coli, која е индикатор за фекално загадување.
СДСМ тврди дека нема информации дали надлежните институции и локалната самоуправа презеле мерки за надминување на состојбата, поради што советниците побарале ова прашање да биде ставено како посебна точка на дневниот ред на Советот.
Во партиското соопштение се посочува и на неодамнешните случаи со загадена вода во Гостивар, Валандово, Лешок и Крушево, по што од СДСМ бараат итна и сеопфатна проверка на водата за пиење во сите градови и општини во Македонија, како и јавно објавување на резултатите.
Од партијата упатија критики кон Владата, оценувајќи дека граѓаните имаат право да знаат каков е квалитетот на водата што ја користат и побараа надлежните институции да излезат со конкретни информации и мерки.
За изнесените политички оценки и тврдења во партиското соопштение не се приложени дополнителни докази.
