СДСМ бара Вранецот да се откупува по 28, а Смедеревката по 25 денари

Лозарите се соочуваат со ниски откупни цени и непродадено грозје, а Владата не презема мерки за да им помогне, обвини членката на Извршниот одбор на СДСМ, Симона Цветаноски. Таа побара зголемување на откупната цена, укинување на попустот за побрза исплата и интервентен откуп на непродаденото црно грозје.

„Пет и пол милиони евра народни пари за криминални договори на Мицкоски и ВМРО-ДПМНЕ преку Лотарија, а нула денари за лозарите. Лозарите се пред пропаст, а Владата не прави ништо за да им помогне“, изјави Цветаноски.

— реклама —

Според неа, грозјето скапува по лозјата, Вранецот не се откупува, а белото грозје се плаќа по 14 денари за килограм, иако трошоците за производство се значително зголемени.

„Лозарите се во безизлезна состојба, оставени сами, без никаква поддршка. Цела година работат, вложуваат, плаќаат работници, гориво, препарати и ѓубрива, а денес се принудени да ги откорнуваат лозјата и да гледаат како им скапува родот“, рече Цветаноски.

— реклама —

Таа го повика министерот за земјоделство да одговори што се случило со претходно најавената цена на грозјето од 20 денари за килограм.

„Каде е сега производната или, како што ја претстави министерот за земјоделство, откупната цена на грозјето? Четиринаесет денари се далеку од 20 денари, како што министерот објави во јули годинава“, додаде таа.

— реклама —

Цветаноски тврди дека власта не може да се претставува само како посредник бидејќи, како што рече, државата со закон учествува во формирањето на откупната цена.

„За две години ВМРО-ДПМНЕ направи пустош во секоја гранка на земјоделството. Не им е важен лозарот, кој со својот труд ја одржува Тиквешијата и целиот лозарски крај и е заслужен за квалитетното македонско вино“, изјави Цветаноски.

— реклама —

Од СДСМ бараат Владата веднаш да обезбеди откуп, да донесе интервентни мерки и да ги заштити лозарите. Партијата предлага Вранецот да се откупува по 28 денари, а Смедеревката по 25 денари за килограм.

„Бараме итно зголемување на откупната цена за пет денари по килограм, укинување на попустот од осум проценти што се бара за побрза исплата и интервентен откуп од страна на државата на црното грозје што ќе остане непродадено. Тоа се мерки што ќе им помогнат на лозарите да ја пребродат кризата“, порача Цветаноски.