СДСМ реагираше на изјавата на градоначалникот на Скопје, Орце Ѓорѓиевски, кој спорниот билборд, поставен на влезот во главниот град, на кој се забележуваат повеќе неправилности, го оцени како „печатна грешка“.
Од партијата тврдат дека не станува збор за печатна грешка, туку за графичко решение изработено без соодветна контрола и проверка, посочувајќи дека на билбордот се прикажани, како што велат, „коњ со пет нозе, мост без крај и храмот Свети Сава од Белград наместо скопски пејзаж“.
Според СДСМ, ваквото решение, како и објаснувањето на градоначалникот, се доказ за, како што наведуваат, негрижа и неодговорно работење на градските власти. Во соопштението, партијата упатува критики и за состојбата со јавната хигиена и јавниот превоз во Скопје.
СДСМ истовремено поставува неколку прашања до Град Скопје, барајќи да се објави кои фирми учествувале во изработката на графичкото решение, по кои критериуми бил избран изведувачот и дали за проектот била спроведена јавна набавка согласно со законските процедури.
Од партијата оценуваат дека наместо да се фокусира на решавање на клучните проблеми во градот, градската власт се занимава со, како што тврдат, промотивни проекти што предизвикуваат негативни реакции.
