СДСМ обвини дека Македонија повторно останува во застој на патот кон Европската Унија, додека четири други земји направиле нов чекор напред во евроинтегративниот процес.
Од партијата оценуваат дека, според нив, тоа не е последица на надворешни околности, туку на политиките на премиерот Христијан Мицкоски и Владата.
„Европската Унија не е само политички проект. Таа значи пристап до фондови, инвестиции, подобар животен стандард и повеќе можности за граѓаните“, наведуваат од СДСМ.
Според опозициската партија, напредокот кон ЕУ би овозможил младите да останат во државата, работниците да имаат подобри услови за живот, а пензионерите подостоинствен живот.
Од СДСМ тврдат дека Владата со блокирање на реформите и, како што наведуваат, погрешни политики, ја држи државата во изолација и ја лишува од европски фондови, инвестиции и економски развој.
„Додека другите земји напредуваат и им обезбедуваат европска иднина на своите граѓани, Мицкоски ја осудува Македонија на стагнација и сиромаштија“, порачуваат од СДСМ.
