СДСМ соопшти дека податоците на Евростат и Народната банка ја потврдуваат, како што велат, реалната економска состојба во земјата и ги демантираат изјавите на премиерот Христијан Мицкоски за македонската економија.
Од партијата наведуваат дека Македонија има БДП по жител кој изнесува 43 проценти од просекот на Европската Унија, што, според нив, ја става меѓу земјите со најнизок животен стандард во Европа.
„НБРМ и Евростат потврдија: Македонија е меѓу земјите со најнизок БДП по жител во Европа. Само 43 проценти од просекот на ЕУ. Во регионот – речиси на дното“, велат од СДСМ.
Според опозициската партија, ова е реалност што граѓаните ја чувствуваат секојдневно преку ниските плати, високите трошоци за живот и иселувањето на младите.
Во реакцијата се посочува дека, додека Мицкоски, како што тврдат од СДСМ, зборувал дека Македонија е „трета“, а потоа и „прва економија во Европа“, официјалните европски статистики покажуваат дека земјата е меѓу најсиромашните.
Од СДСМ оценуваат дека членството во Европската Унија би донело поголем пристап до европски фондови, повисоки плати и пензии, слободно движење, независно судство и поголеми можности за младите.
„Тоа е разликата меѓу бајките на Мицкоски и реалниот живот. Затоа ни е потребна Европа. Не затоа што некој ни наложува, туку затоа што без неа, а со Мицкоски, остануваме таму каде што сме – на дното“, се наведува во соопштението на СДСМ.
