Премиерот Христијан Мицкоски, коментирајќи ја последната политичка анкета според која ВМРО-ДПМНЕ има водство, изјави дека Владата останува фокусирана на работа, реализација на проекти и спроведување реформи, додека опозицијата, според него, ја темели својата стратегија на лаги, клевети и навреди.
„Ние сме фокусирани на работа, на проекти, на реализирање на реформи. Тоа е нашата задача. Од друга страна, имаме опозиција која е поделена на два дела, а нивната стратегија се темели на две основи – едната е да кажуваат невистини во јавноста, да навредуваат, да измислуваат, да клеветат. Често лично ме навредуваат мене и моето семејство“, рече Мицкоски.
Тој додаде дека, покрај тоа, опозицијата постојано шири, како што рече, невистини, наведувајќи примери како тврдењата дека „само што не стигнале мигрантите“ или дека „државата само што не банкротирала“.
Осврнувајќи се и на Левица, премиерот оцени дека партијата има двојни стандарди.
„Левица едно зборува зад завеса кога се договара, а друго зборува пред завеса, мислејќи дека така ќе добие повеќе гласови кај своите поддржувачи“, изјави Мицкоски.
Тој смета дека дел од политичките противници се обидуваат преку лаги, клевети и, како што рече, „сечење и лепење“ да создадат негативен имиџ за Владата, но оцени дека тоа не поминува кај мнозинството граѓани.
„Тие се свесни дека оваа Влада, предводена од ВМРО-ДПМНЕ, работи и го остава срцето на терен во рамките на своите можности. Се разбира, кој работи понекогаш и ќе згреши. Не може да згреши само некој што ништо не работи, седи на страна и се обидува да попречува додека некој друг работи“, рече премиерот.
На крајот, Мицкоски порача дека Владата ќе продолжи со работа, додавајќи дека грешки се можни, но дека најважно е да се исполнуваат очекувањата на граѓаните.
„Однапред се извинувам за некоја грешка што ќе ја направиме, се случува. Само тој што не работи не може да погреши. Важно е да работиме и да го испорачаме тоа што граѓаните го очекуваат од нас“, изјави Мицкоски.
