СДСМ преку соопштение упати остри критики кон поранешниот генерален секретар и потпретседател на партијата, Игор Ивановски, обвинувајќи го дека во неодамнешно телевизиско интервју ниту еднаш не го споменал премиерот Христијан Мицкоски и дека, наместо власта, ја напаѓа сопствената партија.
Од СДСМ наведуваат дека Ивановски, кој во минатото бил дел од највисокото партиско раководство и шеф на тимот што ја подготвувал програмата за парламентарните избори во 2024 година, денес се претставува како реформатор, иако, според нив, токму луѓето околу него ја креирале програмата со која партијата ги загубила изборите.
Во соопштението се поставува прашањето зошто Ивановски не се кандидирал на внатрепартиските избори во 2024 и 2025 година и не побарал доверба од членството кога за тоа имал можност, туку, како што тврдат од СДСМ, сега однадвор се обидува да ја ослабне партијата.
Според партијата, таканаречената реформска платформа не претставува иницијатива за вистински промени, туку проект за поделба и слабеење на опозицијата. Воедно, СДСМ оценува дека лицата кои ја промовираат платформата, наместо да ги критикуваат политиките на власта, ги насочуваат нападите кон сопартијците.
Во соопштението се истакнува и дека претседателот на СДСМ, Венко Филипче, ја презел партијата во тежок период и работи на нејзина консолидација и враќање на довербата кај граѓаните.
Од СДСМ порачуваат дека, според нив, обидите за слабеење на партијата нема да успеат и дека, како што наведуваат, „сателитите на ВМРО нема да поминат“.
