СДСМ преку соопштение обвини дека ВМРО-ДПМНЕ се повикува на доверливоста на истрагата за случајот со труењето во Гостивар, наместо да понуди одговори за, како што велат, доцнењето во информирањето на јавноста и утврдувањето на одговорноста.
Од партијата велат дека премиерот Христијан Мицкоски, кога станува збор за политички противници, јавно зборува за истраги и одговорност, но дека во случајот со Гостивар „одеднаш нема чувство“ и се повикува на доверливоста на постапката.
СДСМ тврди дека информациите за труењето на граѓаните во Гостивар биле криени од јавноста пет дена и дека институциите, според нив, не реагирале навреме.
Од партијата прашуваат зошто Обвинителството не ги објавило резултатите од анализите на водата, кого, според нив, штитело и зошто Министерството за здравство и здравствените инспекции не ја информирале јавноста во првите денови по случајот.
„Граѓаните на Гостивар не сакаат изговори. Сакаат одговорност. И таа одговорност не може да се крие зад зборовите ‘доверливост’ и ‘истрага’“, наведуваат од СДСМ.
