СДСМ преку соопштение реагира по најновата одлука за зголемување на цените на горивата, оценувајќи дека, наместо најавеното намалување на цените, граѓаните повторно се соочуваат со поскапување.
Од партијата посочуваат дека од полноќ дизелот поскапува за 4,5 денари по литар, а бензините за 3 денари, додавајќи дека ова е второ поскапување по најавите на премиерот Христијан Мицкоски за мерки за намалување на цените.
Според СДСМ, граѓаните веќе стравуваат од ваквите најави, бидејќи, како што велат, по нив следуваат нови поскапувања, не само на горивата, туку и на останатите производи.
Во соопштението се оценува дека економската состојба е тешка, потрошувачката кошничка постојано расте, а животниот стандард на граѓаните се влошува. Од СДСМ тврдат и дека нема реален раст на платите, ниту сигурност за пензиите, обвинувајќи ја Владата за нови задолжувања.
„Со Мицкоски сè е лотарија. Само што тој секогаш добива, а граѓаните секогаш губат“, се наведува во партиската реакција.
