СДСМ: Каква лага, не може Милошоски да каже дека Урсула фон дер Лајен лаже

СДСМ го обвини Антонио Милошоски дека шири невистини за наводно оставена можност за ново бугарско вето, овојпат поврзано со македонскиот јазик во Европската Унија. Од партијата тврдат дека изјавите на европските и домашните претставници потврдуваат дека македонскиот јазик и идентитет се заштитени.

Од СДСМ посочуваат дека претседателката на Европската комисија, Урсула фон дер Лајен, му порачала на премиерот Христијан Мицкоски дека Европа ја чека Македонија со нејзиниот идентитет и јазик. Воедно, потсетуваат на неговата изјава дека Договорот од Преспа е „ремек-дело на дипломатијата“, како и на ставот на претседателката Гордана Сиљановска-Давкова дека прашањето за јазикот и идентитетот е разрешено.

— реклама —

Партијата го наведува и договорот за Фронтекс, потпишан на македонски јазик, како аргумент во прилог на своите тврдења.

— реклама —

„Не можете да кажете дека Урсула фон дер Лајен лаже. Не можете да ја припишете вистината на претходната влада, па да ја обвините за тоа што самите го блокирате европскиот пат“, наведуваат од СДСМ.

Од опозициската партија оценуваат дека реформите се во застој и дека не е исполнето ветувањето за напредок до 1 јуни. Според нив, додека други земји добиваат патоказ за евроинтеграциите, Македонија останува во изолација.

— реклама —

Од СДСМ додаваат дека и пред изборите укажувале оти македонскиот јазик и идентитет се заштитени, а сега, како што велат, тоа било потврдено и со конкретни документи и изјави.

Во партиското соопштение упатија и остри обвинувања кон власта во врска со Лаура Ковеши, најавувајќи дека таа ќе се соочи со политичка одговорност и соочување со независното судство.

„Народот гледа. Власта ќе се врати во рацете на граѓаните, а бандата ќе одговара и пред независното судство и пред Лаура Ковеши“, порачуваат од СДСМ.