СДСМ го обвини премиерот Христијан Мицкоски дека ја доведува јавноста во заблуда со тврдењето оти за концертот на Дејвид Гета и останатите настани по повод 35 години независност од државниот Буџет биле потрошени „нула денари“.
Од опозициската партија прашуваат дали средствата што ги издвојувала Државната лотарија, која е во државна сопственост, не треба да се сметаат за јавни средства.
„Гета бесплатно? Целата прослава бесплатно? Тоа што го платила Државна Лотарија, која е во сопственост на државата – тоа не важи?“, прашуваат од СДСМ.
Од партијата тврдат дека доколку државна компанија покрива трошоци поврзани со владините прослави и концерти, станува збор за средства кои, според нив, повторно се пари на граѓаните.
„Кога државна компанија плаќа од дивидендата за концерти и прослави на Владата – тоа се пари на граѓаните. Нема „нула денари“. Има префрлање на трошокот од еден џеб на државата во друг“, велат од СДСМ.
Опозициската партија дополнително ја критикува Владата за трошењето на средства за големи музички настани, додека, како што тврди СДСМ, државата се задолжува и има недостиг на средства за други потреби.
„Мицкоски, граѓаните не се идиоти. Гледаат каде одат парите. И знаат дека „нула денари“ е само уште една лага“, наведуваат од СДСМ.
