СДСМ преку соопштение упати остри критики кон премиерот Христијан Мицкоски и власта, обвинувајќи ги дека создаваат поделби во општеството и дека граѓаните кои ја критикуваат Владата ги нарекуваат „талог“.
Од партијата велат дека според Мицкоски, како што тврдат, за „талог“ се смета секој што се спротивставува на власта, се залага за европска интеграција, демократија, слобода на говор и подобар животен стандард.
СДСМ го обвинува Мицкоски и за, како што наведуваат, „фашистички методи“ и прави споредба со политиките на српскиот претседател Александар Вучиќ.
„Целта им е да го убедат народот дека тие се елита. Исто како елитата на СНС. Надменоста и ароганцијата се одлики на оваа „елита“. Нема одговори на прашања – има само навреди“, наведуваат од СДСМ.
Опозициската партија изнесува и обвинувања за медиумското влијание на власта, тврдејќи дека преку, како што ги нарекува, „ВМРО-Орбан мрежа“ и „Ало групата“, власта настојува да обезбеди доминантно влијание врз медиумскиот простор.
СДСМ дополнително ја обвинува власта за фаворизирање на, како што наведуваат, интересите на тесен круг луѓе, наместо за решавање на економските проблеми на граѓаните.
„За поголема минимална плата – ниту збор. За мерки што ќе им помогнат на граѓаните поради скапотијата – ниту збор. За законот за двојно државјанство на државните функционери – ниту збор. За реформи – ниту збор“, стои во реакцијата.
Од СДСМ изнесуваат и тврдења за наводни поврзаности со компании и лица од Бугарија, како и обвинувања за нетранспарентно трошење и корупција, но без во реакцијата да понудат дополнителна документација за нив.
Во реакцијата се упатуваат критики и за односот на власта кон европската интеграција, како и за настани поврзани со одбележувањето на личности од воените конфликти во поранешна Југославија.
„Граѓаните не се талог. Граѓаните се сопственици на оваа држава“, порачуваат од СДСМ.
Од партијата додаваат дека власта, според нив, ќе мора да одговара пред граѓаните и институциите за своето работење и најавуваат дека, како што велат, „ќе победи народот“.
