Од СДСМ обвинија дека Владата и премиерот Христијан Мицкоски не дале одговор на нивните прашања поврзани со договорот за лобирање во САД и наводите содржани во документ поднесен до американското Министерство за правда.
Од партијата тврдат дека во 2026 година приватната компанија АТС Груп ДООЕЛ Скопје ѝ плаќа на американската лобистичка компанија Mercury 130.000 долари месечно, односно околу 1,56 милиони долари годишно.
Според СДСМ, на 2 април истата компанија го предала материјалот „Стратешко партнерство САД–Северна Македонија“, во кој, како што наведуваат, се споменуваат владино-владино партнерство и имињата на Доналд Трамп и Христијан Мицкоски.
Од СДСМ прашуваат зошто во материјалот се опфатени теми како енергија, ЛНГ, ИТ-договори и одбрана, ако станува збор за приватен договор меѓу две компании.
Партијата го отвора и прашањето за антимонот, кој, според нив, е поврзан со воената индустрија и со рударски активности кај Крива Паланка. Од СДСМ тврдат дека јаловината може да влијае врз почвата и водата, додека интересот за оваа суровина го поврзуваат со приватни економски интереси.
Од СДСМ го поставуваат и прашањето за дипломатскиот пасош на лице кое, според нив, работи во извозот на оружје, како и за средбите на Мицкоски за време на престојот во САД.
„Приватна компанија плаќа. Мицкоски ја пласира агендата како државна. Всушност не е“, наведуваат од СДСМ.
Од партијата дополнително тврдат дека, доколку средбата што Мицкоски ја имал во САД не била наведена во официјалната агенда на американските власти, тогаш станувало збор за неформален контакт, а не за државна средба.
СДСМ бара одговор на прашањето кој ја финансира лобистичката активност во име на Владата и зошто, како што велат, приватни интереси се поврзуваат со државната агенда.
„Нема автогол. Има документ од американското Министерство за правда. Тие немаат одговор на хартијата. Имаат матрица“, наведуваат од СДСМ.
