СДСМ преку соопштение оцени дека најавената реконструкција на Владата не претставува „нова енергија“, туку обид да се прикријат, како што велат, неисполнетите ветувања и слабите резултати на Владата предводена од премиерот Христијан Мицкоски.
Од опозициската партија реагираат на изјавата на Мицкоски дека реконструкцијата носи „нова енергија, ново темпо и уште поголема одговорност“, оценувајќи дека станува збор за политичка флоскула.
„Вистината е дека оваа Влада веќе две години не успеа да испорача ниту едно од клучните ветувања. Европскиот пат е блокиран, реформите се запрени, економијата е во криза, а буџетот е празен“, наведуваат од СДСМ.
Според партијата, реконструкцијата не е знак на сила, туку признание дека Владата не функционира и обид да се создаде привид на активност.
Од СДСМ тврдат дека наместо конкретни резултати, граѓаните добиваат козметички промени и празни ветувања, додавајќи дека вистинските промени ќе дојдат со заминување на актуелната Влада и, како што наведуваат, со утврдување одговорност за криминалот и корупцијата.
