Општинската организација на СДСМ во Валандово бара итен интервентен откуп на грозјето и конкретни мерки за лозарите, обвинувајќи ја власта дека издвојува милионски суми за концерти и манифестации, додека земјоделците се соочуваат со проблеми со пласманот на производите.
Претседателката на валандовската организација на СДСМ, Еми Заева-Костова, на прес-конференција тврдеше дека лозарите го нудат грозјето по цена од 14 денари за килограм, но дека и по таа цена имаат проблем да го продадат.
„Силно светнал ден, но прашањето е за кого, почитувани граѓани? Дали силно светнал ден за земјоделците кои се мачат да ги продадат градинарските производи, зелки, домати, пиперки или да ги фрлат на отпад? Или за лозарите кои своето грозје го нудат за мизерни 14 денари по килограм и никој не го откупува?“, рече Заева-Костова.
Од СДСМ ја поврзаа состојбата во земјоделството со средствата потрошени за одбележувањето на 35-годишнината од независноста и придружните манифестации. Заева-Костова тврди дека околу пет милиони евра се издвоени за концерти и каравани, додека, според неа, за лозарите во актуелната криза нема соодветна помош.
„Пет милиони евра да се вратеа како мерки кон земјоделството и лозарството, сега ќе ја немавме оваа криза и лозарите достоинствено ќе си ги испратеа децата на школо, без да им кратат основни потреби“, рече таа.
СДСМ бара Владата да соопшти каде и на кои компании завршиле средствата за организација на концертите и манифестациите, а Заева-Костова обвини дека тие биле плаќани по цени повисоки од реалните. За ваквите обвинувања на прес-конференцијата не беа презентирани докази.
„Бараме конкретни мерки за лозарството и итен интервентен откуп. Како лозарски крај, кој природата го надарила со благородно поднебје, не е во ред лозарите да го остават својот род да скапува“, порача Заева-Костова.
Таа ја критикуваше власта дека наместо на терен со земјоделците, вниманието го насочила кон организирањето прослави.
„Наместо по концерти, каравани и прескапи игранки по сите градови и организирање спектакли, требаше да бидете помеѓу лозарите. Само тогаш ќе бевте достојни да го цитирате Рацин“, рече Заева-Костова.
Од валандовскиот СДСМ направија споредба и со периодот кога партијата беше на власт, посочувајќи ги субвенциите и мерката „зелена нафта“ како примери за поддршка што тогаш ја добивале земјоделците.
Заева-Костова најави дека партијата ќе продолжи да бара мерки за земјоделците и отчет за трошењето на јавните средства.
„Нема да молчиме кога ни е засегнат народот и ќе продолжиме да ги бараме правата и мерките, затоа што финансиите во буџетот се јавни средства и сите заслужуваме одговор каде тие завршуваат“, рече таа.
На крајот, Заева-Костова порача дека незадоволството на земјоделците и лозарите ќе има и политички последици доколку власта не реагира.
„Народот ќе ви ја даде довербата и власта, но истиот тој народ кој го понижувате одлично ги знае работите и токму тој кој ви ја даде власта, тој и ќе ви ја одземе“, порача Заева-Костова.
