СДСМ оцени дека ослободителната пресуда за поранешниот премиер Никола Груевски во предметот „Талир 2“ е уште еден доказ дека, како што тврдат, правосудството е под политичка контрола.
„Вчера судот го ослободи Никола Груевски во случајот „Талир 2“. Ова не е изненадување. Тоа е уште еден доказ дека правосудството во Македонија е под директна контрола на Христијан Мицкоски и неговата организирана криминална група ВМРО“, наведуваат од СДСМ.
Од партијата тврдат дека Груевски не е ослободен затоа што е невин, туку затоа што, според нив, „Мицкоски го заштитил својот ментор“.
„Сè што се случува во правосудството во последните две години покажува дека Мицкоски има целосна контрола врз обвинителството и судовите. Тој јавно дава задачи од собраниската говорница, преку медиуми и преку телефон“, се наведува во соопштението.
СДСМ додава дека обвинителството, според нив, постапува по политички налози, а вчерашната одлука во предметот „Талир 2“ ја оценува како потврда на тие тврдења.
„Никола Груевски со години е бегалец во Унгарија, под заштита на Виктор Орбан. Денес, благодарение на Христијан Мицкоски, тој добива и судска заштита во Македонија“, велат од СДСМ.
Во соопштението партијата наведува и дека, според нив, одбивањето да се испратат документи за екстрадиција, како и јавните пораки и притисоци врз институциите, биле насочени кон заштита на поранешниот премиер.
„Прашањето е едноставно: Дали Мицкоски и за овој случај имаше ‘чувство’?“, прашуваат од СДСМ.
