Владата на премиерот Христијан Мицкоски ќе остане запаметена по новите задолжувања и политиката на изолација, а не по изградбата на автопати и големи инфраструктурни проекти, обвинија денеска од СДСМ.
Од партијата тврдат дека јавниот долг веќе надминал 11 милијарди евра и дека за две години Владата ја задолжила државата за околу 2,5 милијарди евра.
Според СДСМ, меѓу новите задолжувања се и заемот од 260 милиони евра од странски банки, како и претходно обезбедениот заем од една милијарда евра од Унгарија.
„Наместо да го намалува јавниот долг, Владата продолжува со нови задолжувања, а истовремено најавува нови големи инфраструктурни проекти“, наведуваат од партијата.
Во соопштението се оценува и дека надворешната политика на Владата ја води државата кон изолација, со блокиран евроинтеграциски процес и нарушени односи со соседните земји.
Од СДСМ додаваат дека Владата нема да биде запаметена по автопатите, туку, како што велат, по зголемената задолженост, изолацијата и недостигот од визија за развој на државата.
