СДСМ: Панче Тошковски ја пушти Михаилова, сè се работи под маса откако ВМРО-ОК е на власт

СДСМ преку соопштение бара оставка од министерот за внатрешни работи Панче Тошковски и утврдување одговорност за случајот со Ива Михаилова, откако се појавија информации дека таа е во Бугарија, иако претходно ѝ биле одземени македонскиот и бугарскиот пасош.

— реклама —

Од СДСМ прашуваат како Михаилова ја напуштила државата, имајќи предвид дека, според досега објавените информации, македонската полиција нема евидентиран нејзин излез, а бугарската гранична полиција нема евидентиран влез. Партијата посочува дека Михаилова тврди оти границата ја преминала легално, со лична карта, и дека граничните службеници знаеле која е таа.

Од опозициската партија обвинуваат дека во државата се случуваат договори зад затворени врати и низа случаи во кои, според нив, институциите не постапуваат соодветно. Во реакцијата се споменуваат и случаи со дрога, бегство на осомничен од полициска станица, како и други настани за кои СДСМ бара одговорност од власта.

— реклама —

Од партијата се повикуваат и на изјавата на министерот за надворешни работи Тимчо Муцунски дека судската постапка е во надлежност на судството и дека извршната власт не се меша во неа. СДСМ прашува како, во такви околности, Михаилова успеала да ја напушти државата и покрај изречените мерки.

— реклама —

СДСМ повторно бара одговор како пет тони дрога поминале преку границата и упатува критики за системот „Безбеден град“ и за наводното следење на граѓаните.

„Границата не е решето само за дрога и за бегалци од правда. Со Мицкоски, Тошковски и ВМРО границата е решето и кога судот ќе забрани“, наведуваат од СДСМ.

— реклама —

Партијата бара случајот со Михаилова целосно да се расчисти, да се утврди одговорност и Тошковски да поднесе оставка, обвинувајќи за злоупотреби во полицијата.