СДСМ преку соопштение оцени дека реконструкцијата на Владата не претставува вистинска промена, туку, како што велат, обид за прикривање на неуспесите на актуелната власт.
Од партијата посочуваат дека најавите на премиерот Христијан Мицкоски за „нова енергија“ и „ново темпо“ се само козметички потези кои, според нив, не ги решаваат клучните проблеми со кои се соочува државата.
„Ова не е реконструкција што носи одговорност, туку прегрупирање на луѓе кои веќе две години ја водат државата во криза. Економијата тоне, буџетот е празен, европскиот пат е блокиран, а граѓаните секојдневно се соочуваат со поскапувања“, наведуваат од СДСМ.
Според опозициската партија, наместо да се соочи со, како што велат, сопствените неуспеси, премиерот создава привид на активност преку реконструкцијата на Владата.
СДСМ ја обвини власта и за, како што наведуваат, недолично однесување кон опозициските пратеници во Собранието, тврдејќи дека со тоа се нарушува угледот на законодавниот дом.
Од партијата оценуваат дека реконструкцијата е вовед во можни предвремени парламентарни избори и тврдат дека власта се обидува да создаде услови и оправдување за нивно распишување.
„Реконструкциите и преименувањата не ја решаваат кризата. Граѓаните веќе знаат дека празните ветувања не се решение“, порачуваат од СДСМ.
