СДСМ утрово излезе со две остри реакции против премиерот Христијан Мицкоски и ВМРО-ДПМНЕ, оспорувајќи ги неговите тврдења за растот на пензиите, економијата и борбата против криминалот. Опозициската партија притоа изнесе и серија тешки обвинувања за злоупотреба на државните институции и јавните пари.
Првата реакција следува по изјавите на Мицкоски за економските резултати на Владата и неговото тврдење дека растот на пензиите е значително поголем во споредба со периодот на владеење на СДСМ.
„Овој пат пензиите му пораснале ‘16 пати’ повеќе отколку во времето на СДСМ, а граѓаните наводно живееле подобро отколку пред три години. 16 пати. Не процент. Пати“, реагираат од СДСМ.
Партијата ги оспорува и оценките на премиерот за позицијата на македонската економија, како и резултатите во туризмот и авиосообраќајот, тврдејќи дека статистиката што ја презентира власта не се чувствува во секојдневниот живот.
„Македонија кај него е економски тигар. Само народот тоа уште не го видел на сметката“, велат од СДСМ, додавајќи дека граѓаните реалноста ја мерат преку цените во продавниците, аптеките, сметките за струја и сопствените приходи.
СДСМ повторно го отвора и прашањето за средствата од Државната лотарија употребени за одбележувањето на 35-годишнината од независноста, тврдејќи дека станува збор за 5,5 милиони евра и обвинувајќи ја власта дека јавните средства ги претвора во инструмент за политичка промоција.
Опозицијата изнесува критики и за состојбата во ПИОМ и вториот пензиски столб, при што тврди дека власта се обидува финансиските проблеми да ги покрива на товар на заштедите на граѓаните.
„Нема 16 пати поголем раст. Има 16 пати поголем цинизам. Нема подобар живот од пред три години. Има само режија на лагата“, се наведува во реакцијата.
Во второто соопштение, СДСМ се осврнува на изјавата на Мицкоски дека „нема веќе банди, нема веќе криминал, нема рекетирање, нема веќе марихуана економија, нема веќе провизии од Лотарија“.
Од партијата возвраќаат дека токму оваа изјава, според нив, претставува „автопортрет на власта“.
„Нема мали банди точно, има само една голема, таа контролира сè. Нема повеќе улични банди – има партиска“, обвинува СДСМ.
Партијата оди чекор понатаму и изнесува сериозни обвинувања дека ВМРО-ДПМНЕ воспоставила влијание во повеќе сегменти од државниот систем – од јавните набавки и правосудството, преку безбедносните институции, до енергетиката и игрите на среќа.
Во соопштението се споменува и случајот со петте тони марихуана за кои СДСМ тврди дека поминале преку границата и царината кон Србија, па и со полициска придружба, а од партијата бараат криминалот да се докажува или расчистува преку независни истраги, а не преку политички изјави.
„Криминалот не исчезнува со изјава. Исчезнува со истрага која не застанува пред презиме, функција и партиска книшка“, порачуваат од СДСМ.
Во двете реакции опозициската партија користи исклучително остра реторика кон Мицкоски, нарекувајќи го „арамија“ и „шеф на банда“, а ВМРО-ДПМНЕ ја именува како „ВМРО-ОКГ“.
Станува збор за политички обвинувања и квалификации на СДСМ. Во доставените соопштенија не се приложени судски одлуки или други докази со кои би се потврдиле тврдењата за организирана криминална група, криминална одговорност на Мицкоски или останатите тешки обвинувања што партијата ги изнесува.
