СДСМ преку соопштение бара Владата да ги прифати нивните предлози за целосно укинување на акцизата за горивата и намалување на ДДВ од 18 на пет отсто, оценувајќи дека со овие две мерки граѓаните би добиле значително поголема заштеда.
Од партијата велат дека во услови на раст на цените и горива кои надминале 100 денари за литар, семејните буџети се под сè поголем притисок. Според СДСМ, мерките што ги презела Владата се задоцнети и недоволни и немаат значаен ефект врз животниот стандард на граѓаните.
Како решение СДСМ ги предлага целосното укинување на акцизата за горивата и намалувањето на ДДВ од 18 на пет проценти.
„Со мерките на СДСМ, граѓанин со просечна плата ќе може да купи дури 205 литри бензин повеќе отколку со мерките што ги предлага Владата“, наведуваат од партијата.
Според СДСМ, поевтините горива би довеле и до намалување на транспортните трошоци, што би создало услови за пониски цени на храната и другите основни производи.
Од опозициската партија бараат Владата веднаш да ги прифати предложените мерки, оценувајќи дека во услови на економска криза јавните средства треба да се насочат кон граѓаните.
Во реакцијата СДСМ упатува и политички критики кон премиерот Христијан Мицкоски и Владата, обвинувајќи ги за трошење средства на, како што наведуваат, „спектакли, тендери и луксуз“, наместо за мерки што директно би им помогнале на семејствата.
