СДСМ преку соопштение обвини дека Владата се повикува на статистички показатели за инфлацијата, додека граѓаните и понатаму се соочуваат со високи цени, ниски плати и сè потежок животен стандард.
Од партијата велат дека, иако Владата се пофалила со најниска инфлација во регионот, тоа не ја отсликува реалната состојба со која секојдневно се соочуваат граѓаните.
„Граѓаните не живеат од статистички извештаи, туку од платите и од тоа што можат да си го купат во маркетите. Потрошувачката кошница и натаму е тешко достижна, а инфлацијата сè уште е повисока од она што Владата го ветуваше во својата програма и во Буџетот за 2026 година“, наведуваат од СДСМ.
Според опозициската партија, цените на основните производи останале високи, додека минималната и просечната плата се меѓу најниските во Европа.
Во соопштението се тврди и дека странските инвестиции се намалени за повеќе од 60 проценти во споредба со периодот пред актуелната Влада, што, според СДСМ, е показател за економска стагнација и намален инвестициски интерес.
„Македонија под раководство на Мицкоски стана трета економија на празни фрижидери – држава во која власта се фали со бројки, а граѓаните сè потешко ги покриваат основните животни трошоци“, наведуваат од СДСМ.
Од партијата додаваат дека, според нив, Владата се обидува да ја прикрие економската и социјалната состојба со, како што велат, селективни статистички податоци и политичка пропаганда.
