СДСМ преку соопштение обвинува дека Владата предводена од Христијан Мицкоски ја зголемува задолженоста на државата, додека премиерот истовремено зборува за економски раст и позиционирање на Македонија како „трета економија во Европа“.
Од опозициската партија велат дека земјата за само две години ќе биде задолжена со околу 4 милијарди евра, оценувајќи дека последиците од ваквата политика ќе ги чувствуваат и идните генерации.
„Внуците ќе ги враќаат кредитите на Мицкоски. Со генерации“, наведуваат од СДСМ.
Од партијата посочуваат дека се очекува ново задолжување од 1,3 милијарди евра, со што, според нив, вкупниот нов долг за две години ќе достигне околу 4 милијарди евра.
СДСМ тврди и дека јавниот долг се приближува кон 12 милијарди евра, односно над 65 отсто од БДП, додека годишните трошоци за камати се зголемиле на околу 350 милиони евра, од претходните околу 120 милиони евра.
„Буџетот е празен, а парите одат во тендери“, обвинуваат од СДСМ.
Опозициската партија се осврнува и на животниот стандард, наведувајќи дека потрошувачката кошничка за две години се зголемила за околу 10.000 денари и сега изнесува околу 90.000 денари со вклучена кирија. Од СДСМ додаваат дека цените значително се зголемиле.
„Мицкоски може да се смее колку сака на своите бројки. Статистиката не ги полни фрижидерите. Граѓаните најдобро ја гледаат во своите празни паричници“, велат од СДСМ.
Од партијата го обвинуваат премиерот дека со економските политики создава дополнителен товар за граѓаните и идните генерации.
