СДСМ преку соопштение ја обвини Владата дека не успева да се справи со економските предизвици, оценувајќи дека реалната состојба на граѓаните е спротивна на, како што велат, владините тврдења за економски успеси.
Од партијата наведуваат дека платите стагнираат, инфлацијата продолжува, а цените на основните производи постојано растат. Според СДСМ, во државниот буџет нема доволно средства за зголемување на платите, а изразуваат и загриженост за идната исплата на пензиите.
Во соопштението се тврди и дека Владата планира да интервенира во вториот пензиски столб за да ги покрие буџетските дефицити, додека претстојната грејна сезона, според партијата, може да донесе дополнителни поскапувања на електричната енергија и огревното дрво.
СДСМ оценува дека земјоделците се соочуваат со тешка состојба поради повисоките цени на горивата и ѓубривата, недостигот на мерки за поддршка, како и, според нив, недостапноста на европските фондови.
„Ова е економската политика на Мицкоски: празни ветувања, празни фрижидери и полни џебови на тендер-коалицијата“, се наведува во соопштението на СДСМ.
