СДСМ ја обвини власта дека манипулира со тврдењата дека недонесувањето на новиот Изборен законик ја блокира европската интеграција на државата, оценувајќи дека Европската Унија не поставила таков услов.
Од партијата велат дека ЕУ бара кредибилни, фер и транспарентни избори, независно судство и борба против корупцијата, а не, како што наведуваат, „промена на Изборниот законик по мерка на една партија“.
„Иако подобрувањето на изборното законодавство е дел од пошироката реформска агенда, конкретните решенија кои во моментов ги турка власта не се обврска кон Европската Унија, ниту претставуваат услов за напредок во преговарачкиот процес. Ова се нивни сопствени предлози, а не европски“, соопшти СДСМ.
Според партијата, предложените законски решенија отвораат простор за манипулации и контрола на изборниот процес, особено во делот на гласањето на дијаспората.
„Наместо да се занимаваме со тоа како да се заштити волјата на граѓаните, се врши притисок да се прифатат решенија кои овозможуваат изборна кражба. Тоа не е напредок кон ЕУ, туку чекор назад кон недемократски практики“, наведуваат од СДСМ.
Од опозициската партија додаваат дека, според нив, вистинската блокада на европскиот пат не доаѓа од опозицијата, туку од власта, која, како што тврдат, не спроведува суштински реформи.
„Фер избори се предуслов за ЕУ, а не закон напишан за да се обезбеди предност за власта. Сè друго е обид да се прикрие сопствената неспособност и корупција зад европската агенда“, порачаа од СДСМ.
