СДСМ преку соопштение обвини дека Владата предводена од Христијан Мицкоски за само две години создала околу четири милијарди евра нов долг, реагирајќи на, како што велат од партијата, обидите на ВМРО-ДПМНЕ постојано да го оправдува своето задолжување со наследените долгови.
Од СДСМ велат дека актуелната власт „ја врти истата плоча“ и постојано се повикува на долгот создаван во изминатите 35 години, но прашуваат што направила Владата во изминатите две години.
Според опозициската партија, темпото на задолжување е највисоко во периодот од осамостојувањето на Македонија. Од СДСМ тврдат и дека државната каса е празна, а задолжувањето се врши речиси секоја недела.
Партијата наведува дека годишните трошоци за камати пораснале од околу 120 на 350 милиони евра. Од СДСМ обвинуваат дека средствата од новите задолжувања не се насочуваат кон платите и пензиите, земјоделците или подобрување на животниот стандард, туку кон, како што тврдат, „криминални партиски тендери“.
СДСМ потсетува и дека ВМРО-ДПМНЕ било на власт во значителен дел од периодот од осамостојувањето, од владата на Љубчо Георгиевски, преку 11-годишното владеење на Никола Груевски, до актуелната влада на Мицкоски.
Од партијата велат дека и претходните влади на ВМРО-ДПМНЕ земале кредити и создавале обврски, поради што, според нив, актуелната власт не може целокупниот долг да го претставува како наследство.
„Бројките за некаков раст не ги полнат фрижидерите“, велат од СДСМ, додавајќи дека граѓаните најдобро го чувствуваат економскиот развој преку своите приходи, сметки и обврските што ќе треба да ги плаќаат идните генерации.
Од СДСМ прават споредба меѓу задолжувањата на претходните влади и актуелната власт. Според нивните тврдења, околу осум милијарди евра е вкупниот долг создаден од сите претходни влади во изминатите децении, додека Владата на Мицкоски, како што наведуваат, создала околу четири милијарди евра нов долг за само две години.
Од опозициската партија велат дека СДСМ се задолжувал за време на пандемијата и светската економска криза со цел да обезбеди средства за граѓаните и стопанството.
СДСМ најави дека ќе продолжи да бара одговори за тоа каде се трошат средствата од новите задолжувања, зошто државната каса, според нив, е празна и до кога ќе продолжи задолжувањето на идните генерации.
