СДСМ: Возач нема моќ да вработува, но Јанушев има, истрагата мора да се прошири

СДСМ преку соопштение бара да се прошири истрагата за случајот со возачот на генералниот секретар на Владата, Игор Јанушев, кој е осомничен дека барал 1.500 евра за посредување при вработување пожарникар во Град Скопје.

Од опозициската партија велат дека случајот со митото не смее да биде затворен само со постапката против возачот, туку треба да се утврди дали во случајот имало и други лица.

— реклама —

„Возач нема никаква моќ да вработува. Но генерален секретар на Влада, како Игор Јанушев, кој воедно е член и на Извршниот комитет на ВМРО-ДПМНЕ, има“, наведуваат од СДСМ.

— реклама —

Според партијата, фактот што возачот бил фатен со претходно обележани банкноти отвора прашање дали тој дејствувал самостојно или можеби бил посредник за некој друг.

„Дали возачот е само негова продолжена рака и посредник?“, прашуваат од СДСМ.

— реклама —

Од опозициската партија потсетуваат и на друг случај поврзан со кабинетот на Јанушев. Како што наведуваат, посебен советник за економски прашања во кабинетот на генералниот секретар на Владата бил меѓу осомничените во истрага за лихварство и перење пари.

— реклама —

СДСМ посочува и на прашања поврзани со имотот на Јанушев, неговата фирма во Бугарија и негови соработници, оценувајќи дека станува збор за „премногу скандали“ поврзани со генералниот секретар на Владата.

Од партијата упатуваат и критика до Обвинителството и бараат истрагата да се прошири и да ги опфати сите можни аспекти на случајот.