СДСМ повторно ја нападна Владата на Христијан Мицкоски поради најавите за набавка на нов владин авион, оценувајќи дека власта покажува погрешни приоритети и дека, како што велат, избира луксуз за функционерите наместо подобар животен стандард за граѓаните.
Од партијата се повикуваат на изјавата на директорот на СОЗР, Ивица Томовски, дека идејата за нов владин авион не е повлечена и дека средствата се оставени.
„За оваа власт ‘сериозна’ држава не се мери со платите на работниците, со полни фрижидери, со функционално здравство, со безбедна вода. Се мери со нов авион за Мицкоски“, велат од СДСМ.
Партијата тврди дека Владата нема пари за минимална плата од 600 евра, но има средства за владин авион.
„Сè може да почека, само авионот не може“, се наведува во реакцијата.
СДСМ притоа ги споменува и проблемите со водоснабдувањето и квалитетот на водата во Гостивар, високите трошоци за живот, потрошувачката кошничка, цената на горивата и откупните цени во земјоделството.
„Граѓаните во Гостивар пет недели да чекаат на вода. Анализите да почекаат. Работниците со минимална плата да чекаат. Потрошувачката кошничка од 70.000 денари да почека. Само авионот не може да чека“, велат од партијата.
Од СДСМ се осврнаа и на образложението дека новиот авион би бил потребен за европските интеграции, инвеститорите и за да не се губи време на редовни авиолинии.
„А сега нема време да патува со редовна линија и да седи во економска класа“, порачуваат од партијата.
СДСМ тврди и дека странските инвестиции се намалени за повеќе од 60 проценти во последните две години, оценувајќи дека доколку Владата навистина била фокусирана на инвестиции, резултатите би биле поинакви.
„Сериозна држава е држава која прво обезбедува безбедна вода за своите граѓани. Сериозна држава обезбедува достоинствени плати, функционално здравство и институции што работат“, велат од СДСМ.
Партијата ја завршува реакцијата со оценка дека приоритетите на власта се „прво луксуз за нив, потоа изговори за граѓаните“.
