„Се обидоа физички да го нападнат, му се заканија дека нема да заврши тука“: Нови детали за заканите кон Стефковски

Закани кон градоначалникот на Гази Баба, Бобан Стефковски, обид за физички напад и наводни политички притисоци да не се урне дивоградба. Александар Трајковски, дел од кабинетот на градоначалникот, со јавно сведоштво открива детали за настаните од септември 2023 година, кои претходеа на изградбата на новата детска градинка во Инџиково.

Во објава на социјалните мрежи, насловена „Како се изгради новата градинка во Инџиково! Да се напише за да не се заборави“, Трајковски тврди дека сè започнало во август 2023 година, кога во Општина Гази Баба пристигнала пријава дека на локацијата предвидена за градинка едно лице започнало бесправна изградба.

Според неговото сведоштво, општинските инспектори веднаш добиле насоки да постапат и да ја запрат градбата, но при првиот увид биле пречекани со закани.

— реклама —

„При првиот увид на местото, лицето поучено од безвластието на СДСМ и ДУИ кои тогаш ја имаа централната власт во Македонија, упати закани кон колегите од инспекција и кон градоначалникот Бобан Стефковски“, напиша Трајковски.

Тој тврди дека градоначалникот останал решителен дивоградбата да биде урната за да може да започне изградбата на ветената градинка. Според објавата, на 6 септември 2023 година бил одржан состанок на кој било договорено уривањето да се спроведе следниот ден, со полициска поддршка. Но, Трајковски изнесува и сериозно обвинување за политичко вмешување во постапката.

„Се подготвено и вечерта на 6 септември, доаѓа повик од власта на СДСМ и ДУИ кој бара да не се постапува. Но тоа Боби не го предомисли“, наведува тој.

Во објавата не прецизира кој го упатил наводниот повик, ниту приложува докази за политичкиот притисок што го опишува. Следното утро, на 7 септември, според Трајковски, општинските служби се собрале во 3:30 часот, а околу четири часот пристигнале во Инџиково, каде што ја урнале дивоградбата. Меѓутоа, според неговото сведоштво, тука не завршиле проблемите.

— реклама —

„Три дена по уривањето, внуците на лицето кое градеше дојдоа на паркингот каде што се паркира возилото во кое се вози градоначалникот на Гази Баба и се обидоа физички да го нападнат, а откако тоа не се случи му кажаа дека ова нема да заврши тука“, напиша Трајковски.

За заканите кон градоначалникот во септември 2023 година известуваше и полицијата. На 15 септември 2023 година беше соопштено дека полициски службеници од Единицата за насилен криминал при СВР Скопје лишиле од слобода три лица со иницијали С.М., Ф.М. и М.М., по пријава поднесена од градоначалникот на Гази Баба.

Според тогашното полициско соопштение, на 11 септември во СВР Скопје било пријавено дека три лица упатувале закани по неговиот живот поради претходно извршено уривање дивоградба во Инџиково.

— реклама —

Полицијата тогаш информираше дека против осомничените била поднесена кривична пријава до Основното јавно обвинителство Скопје за кривичното дело „загрозување на сигурноста“, според член 144 став 4 од Кривичниот законик.

Полицијата тогаш информираше дека против осомничените била поднесена кривична пријава до Основното јавно обвинителство Скопје за кривичното дело „загрозување на сигурноста“, според член 144 став 4 од Кривичниот законик.

Трајковски сега тврди дека лицата биле санкционирани, изведени пред суд и правосилно осудени. Ова тврдење за конечниот судски исход не е поткрепено со пресуда во неговата објава.

— реклама —

Три години подоцна, тој ја поврзува изградбата и пуштањето во употреба на новата градинка во Инџиково со тогашната одлука на општинското раководство да не отстапи од уривањето на бесправниот објект.

„Пораката е јасна, зборот се исполнува, а цената не е важна! Да се знае и запамети, за идни поколенија, како се градеше Гази Баба!“, порача Трајковски.