Се подготвува историска вселенска мисија: Кина испраќа астронаути на Месечината

Кина планира до 2030 година да ја реализира својата прва мисија со човечки екипаж на Месечината, во рамките на која двајца астронаути треба да се спуштат на нејзината површина. Ова беше соопштено на Седмиот кинески симпозиум за вселенски летови со човечки екипаж, одржан во Пекинг.

— реклама —

Заменикот на главниот проектант на кинеската програма за вселенски летови со човечки екипаж и главен проектант на програмата за истражување на Месечината, Ванг Сјанг, изјави дека е планирано првиот кинески екипаж да го сочинуваат тројца астронаути, од кои двајца ќе престојуваат на површината на Месечината, објави „Глобал тајмс“.

Мисијата ќе се заснова на модел на средба и спојување на летала во орбитата на Месечината, со употреба на две ракети-носачи „Лонг Марч-10“.

— реклама —

Според планираното сценарио, со првата ракета во орбитата околу Месечината ќе биде испратен лунарниот модул, додека со втората ќе биде лансирано летало со човечки екипаж, кое потоа ќе се спои со модулот.

— реклама —

Двајцата астронаути ќе преминат во лунарниот модул, кој ќе се одвои од леталото и ќе се спушти на површината на Месечината, каде што ќе вршат научни истражувања.

По завршувањето на активностите, астронаутите со модулот ќе се вратат во лунарната орбита, повторно ќе се спојат со леталото и заедно со третиот член на екипажот ќе тргнат назад кон Земјата.

Според кинескиот весник, истражувачките, развојните и градежните активности во рамките на кинеската програма за испраќање човечки екипаж на Месечината напредуваат според планираната динамика.