Се расплеткува криминалната мрежа во Србија: осомничени 12 лица за убиства, киднапирање и трговија со дрога

Седум лица се уапсени во голема полициска акција во Србија под сомнение дека биле дел од организирана криминална група поврзана со две убиства, извршени во Белград и Пожаревац. Српското Јавно обвинителство за организиран криминал соопшти дека осомничените се товарат за организирање и извршување на убиствата на Милан Стоковиќ и Живко Бакиќ.

Според соопштението, апсењата ги извршиле припадници на Управата за криминалистичка полиција и Службата за борба против организираниот криминал, по налог на обвинителството.

— реклама —

Уапсени се шест лица од Белград, со иницијали Р. Ѓ., М. И., А. С., А. С., П. М. и С. Д., како и Н. Ж. од Пожаревац.

— реклама —

Според обвинителството, Милан Стоковиќ бил киднапиран на 14 октомври минатата година, додека убиството на Живко Бакиќ било извршено во јануари 2026 година.

Во акцијата учествувале и припадници на повеќе полициски служби и единици, меѓу кои Службата за сузбивање на криминалот, единиците за посебни акции, криминалистичка анализа и техничка поддршка, полицијата во Белград, Пожаревац и Нови Сад, Жандармеријата, Специјалната антитерористичка единица и Безбедносно-информативната агенција.

— реклама —

Покрај седумтемина уапсени, со кривичната пријава се опфатени уште пет лица. А. Н. се наоѓа во притвор во Белград, М. С. е во затвор во Македонија, А. Б. е во притвор во Грција, Д. Т. е во притвор во Белгија, додека С. П. е во бегство.

Осомничените се товарат за здружување заради вршење кривични дела, тешко убиство, киднапирање, недозволено производство, држење и трговија со оружје и експлозивни материи, како и неовластено производство и трговија со наркотични дроги.

По истекот на полициското задржување, уапсените ќе бидат спроведени во Јавното обвинителство за организиран криминал, каде што ќе бидат сослушани.