Градоначалникот на општина Аеродром, Дејан Митески, информира дека продолжува интензивната обнова на урбаната опрема низ целата општина, со цел создавање поуредени и пофункционални јавни простори.
Како што посочува, голем дел од планираните активности веќе се реализирани, а на терен се спроведува санација на околу 300 клупи, како и поставување на дополнителни околу 100 нови клупи низ различни локации.
Паралелно се уредуваат детските и спортските игралишта, каде се поставува нова и модернизирана опрема со цел да се обезбедат побезбедни услови за рекреација и спорт на граѓаните.
„Наскоро ќе бидат поставени и 5 нови калистеника зони – современи простори за спорт и активен живот на отворено.
Продолжуваме со интензивна работа на терен сѐ до целосна обнова на урбаната опрема во сите населби и маала, затоа што Аеродром заслужува уредени, современи и функционални јавни простори за сите“, вели Митески
